Fjármálaeftirlitið vekur athygli á breytingum á upplýsingaskyldu útgefenda samkvæmt lögum um verðbréfaviðskipti sem tóku gildi í mars síðastliðnum

28.5.2013

• Útgefendum ber, samhliða birtingu gagnvart almenningi á Evrópska efnahagssvæðinu, að birta innherjaupplýsingar á heimasíðu sinni í að lágmarki eitt ár.
• Láti útgefandi, eða aðili af hans hálfu, í eðlilegu sambandi við starf sitt, stöðu eða hlutverk þriðja aðila í té innherjaupplýsingar, ber útgefanda að birta almenningi á Evrópska efnahagssvæðinu upplýsingarnar nema móttakandi upplýsinganna sé bundinn af þagnarskyldu, af lagalegum eða samningsbundnum ástæðum.
• Útgefendum ber að tilkynna Fjármálaeftirlitinu jafnóðum um ákvarðanir um frestun birtingar innherjaupplýsinga. Tilkynningar þess efnis ber að senda á netfangið fme@fme.is.

Fjármálaeftirlitið beinir því til útgefenda að kynna sér breytingarnar. Nálgast má lög nr. 48/2013 á vef Alþingis hér og uppfærð lög nr. 108/2007 hér.

Frekari upplýsingar veitir Sigurður G. Valgeirsson í símum 520 3700 og 840 3861.