Fréttir: september 2019

Slóvakíska vátryggingafélagið NOVIS hefur selt líftryggingaafurðina Wealth Insuring á Íslandi frá því snemma árs 2018 til nokkurs fjölda íslenskra vátryggingataka. Í ljósi framangreinds telur Fjármálaeftirlitið ástæðu til þess að vekja athygli á fréttatilkynningu á heimasíðu félagsins en þar kemur fram að NOVIS hefur tekið ákvörðun um að hætta sölu Wealth Insuring á Íslandi. 

Vefur Fjármálaeftirlitsins hefur verið uppfærður. Uppfærslan var gerð í samræmi við þarfagreiningu sem unnin var með viðskiptavinum, stjórnendum og starfsmönnum og felur í sér nýja nálgun. Nú verður hægt að velja einn af sex flokkum markaða á forsíðu og færast þá inn á lendingarsíðu hans. Þaðan eiga þeir sem starfa á viðeigandi markaði auðvelt með að nálgast efni sem gagnast þeim. Einnig hafa verið gerðar skipulagsbreytingar á flokknum „Eftirlitsstarfsemi“ sem gera hann markvissari og einfaldari og er heiti flokksins nú „Eftirlit“.

Fjármálaeftirlitið hefur birt gagnatöflur íslenskra vátryggingafélaga á samandregnu formi fyrir annan ársfjórðung 2019. Gagnatöflurnar byggja á ársfjórðungslegum gagnaskilum vátryggingafélaga á móðurfélagsgrunni. Hér er einnig samantekt um þróun helstu stærða úr rekstri skaðatryggingafélaga og líftryggingafélaga á öðrum ársfjórðungi þessa árs.